Fornybare energikilder // Ilaha tamarta ee la cusboonaysiin karo
Maalinkasta waxaan adeegsanaa koronto. Korontadaan waxaan ka helnaa ilo-tamareedyo kala gedisan. Waxaa jira labo nooc oo ilo-tamareed ah: ilo-tamareed la cusboonaysiin karo iyo ilo-tamareed aan la cusboonaysiin karin. Qoraalkan waxaan ku eegi doonaa ilo-tamareedyada la cusboonaysiin karo.
Ilo-tamareed la cusboonaysiin karo macnaheedu waa tamar aan dhamaanayn. Habraac ay dabeecaddu leedahay ayaa iskeed si joogto ah loogu sameeyaa tamar cusub. Tamarta noocaan ah waxaa tusaale u ah tamarta biyaha, tamarta dabeysha iyo tamarta ileyska. Dhammaan saddexdan ilo-tamareed waxay tamarta ka helaan qoraxda. Qorraxda ayaa saddexdaan ilo-tamareed siyaabo kala duwan u siisa tamar.
Korontada laga dhaliyo biyaha
Tamar-biyeed waa tamar ka timaada biyo socda. Norway, waxaan ku haysanaa biyo badan oo socda kuwaas oo ka yimaada biyo-dhacyada iyo wabiyada, taas waxaan uga faaiidaysan karnaa inaan ka soo saarno tamar. Qorraxda ayaa sabab u ah in biyaha dhulka dulyaala ay dhaqaaqaan. Qorraxda ayaa kululaysa biyaha si ay u uumi-baxaan. Kadib biyihii waxaa lagu ururiyaa daruuraha, ugu dambeyntiina waxay ku soo da’aan dhulka. Biyaha dhulka dulyaala waxay ku qulqulaan webiyada ka dibna waxay u sii shubmaan ilaa badweynta.
Korontada laga dhaliyo dabeysha
Qorraxdu waxay sidoo kale kululaysaa hawada taas oo keenta inay dhaqaaqdo. Tan waxaa u lagu magacaabaa dabeyl. Dabaysha socota waxaan ka soo saari karnaa tamar. Waxaan ka faaiidaysan karnaa tamartan annaga oo rakibayna marwaxadaha dabeysha. Marwaxadaha dabaysha ma ahan hindise (ikhtiraac) cusub, sababtoo ah waahore ayaa la adeegsan jiray, sida in lagu shiido badarka iyo in lagu sameeyo burka (daqiiqda).
Tamarta qorraxda
Tamarta ka timaada qorraxda waxaa loo isticmaalaa in lagu kululeeyo biyaha, guryaha aan ku noolnahay iyo waxyaabo kale. Tamarta ka timaada qorraxda waxaa sidoo kale loo adeegsadaa in laga dhaliyo danab iyadoo la adeegsanayo waxa lagu magacaabo unugyada qorraxda.
