Hvordan myggen kom til Sápmi//سامی خطے “ساپمی”میں مچھر کیسے آئے

کافی عرصے پہلے، بہت دور شمال کی جانب، ساپمی میں کئی خاندان مل جل کر ایک چھوٹے سے گاؤں میں رہتے تھے۔ اس گاؤں میں آہکا نامی ایک بوڑھی عورت رہتی تھی۔ آہکا چھوٹے قد کی، تیز اور محنتی خاتون تھی۔ وہ اپنے خاندان اور کتے رانے جس کے ساتھ بچے کھیلنا بہت پسند کرتے تھے، مٹی سے بنے ہوئے خوبصورت گھر میں رہتی تھی۔ یہ گھر ایک ندی کے کنارے واقع تھا، جہاں سے خاندان کے لوگ پانی لاتے اور مچھلیاں پکڑتے تھے۔

ایک دن جب آہکا دریا کے کنارے پانی لینے گئی توآسمان کھل گیا اور زمیں کے خالق اس کے پاس آئے۔

زمین کے خالق نے ابھی ابھی مچھر پید ا کیے تھے اور مچھروں کی پوری جھنڈ کوتھیلے میں ڈال کر مضبوطی سے کس کر دوہری گرہ ڈال کر باندھ دیا تھا۔ انہوں نے آ ہکا کو بتائے بغیرکہ اس کے اندر کیا ہے دے دیا اور کہا کہ اس تھیلے کو بہت حفاظت سے رکھے۔ آہکا نے اس اعتماد کے لیے شکریہ ادا کیا اور تھیلا تھام لیا۔ اس نے وعدہ کیا کہ وہ اسے کبھی نہیں کھولے گی اور نہ ہی کسی اور کو دے گی۔

آہکا تھیلے کو اپنے ساتھ اپنے گھر لے آئی اور اس کا اچھی طرح دیکھ بھال کرنے لگی تاکہ نہ بچے اور نہ ہی کتا اس تک پہنچ سکیں۔ اس لیے وہ اسے ہر جگہ اپنے ساتھ رکھتی تھی۔ جب وہ کام کرنے جاتی تو اپنے ساتھ باہر لے کر جاتی، اور جب سونے لگتی تواپنے سر کے نیچے رکھ کرتکیے کے طور پر استعمال کرتی، لیکن ہر وقت وہ سُن سکتی تھی کہ تھیلے کے اندر کوئی چیز بھنبھنا رہی ہے اور آوازیں نکال رہی ہے۔

آہکا بہت تجسس میں تھی کہ تھیلے میں آخرکیا چیز ہے جو بھنبھنا رہی ہے۔ اس کی بہت خواہش تھی وہ اندر جھانک کر دیکھے، لیکن اسے یاد تھا کہ اس نے اسے نہ کھولنے کا وعدہ کیا تھا۔ مچھر چوبیس گھنٹے تھیلے میں ہنگامہ مچائے ہوئے تھے۔اور آہکا اس بھنبھناہٹ سے بہت زیادہ تنگ ہوتی جا رہی تھی۔ براہ مہربانی ، خاموش رہو، اس نے تھیلے کے اندر ہش یعنی چپ رہنے کو کہا۔ لیکن مچھر قید میں زندگی گزارنے کے لیے نہیں بنائے گئے تھے۔ انھوں نے دن رات گنگنانا اور بھنبھنانا جاری رکھا۔ سُکون کا ایک لمحہ میّسر نہیں تھا۔

آخرکار وہ زیادہ برداشت نہ کر سکی، وہ معلوم کرنا چاہتی تھی کہ تھیلے میں آوازیں کس چیز کی ہیں ۔ یہ معلوم کرنا بالکل دُرست اورمناسب ہوگا کہ میں اصل میں کس چیز کی حفاظت کر رہی ہوں ، آہکا نے سوچا ۔ اُس نے تھیلے کے گِرد بندھی ڈوری کو احتیاط سے ڈھیلا کیا تاکہ وہ دیکھ سکے کہ اُس کے اندر کیا ہے۔

اس سے پہلے کہ اُسے احساس ہوتا، تھیلے سے اُڑ کر مچھر باہر نکل آئے۔ مچھروں کے جُھنڈ نے ہر طرف اُڑنا شروع کر دیا اور انسانوں اور جانوروں کو کاٹنا شروع کر دیا! آہکا بالکل حیران پریشان رہ گئی! وہ مچھروں کے پیچھے بھاگی اور انہیں دوبارہ تھیلے میں ڈالنے کی کوشش کرنے لگی۔ لیکن یہ بالکل ناممکن تھا کیونکہ وہ تعداد میں بہت زیادہ اور بہت ہی چھوٹے تھے۔ مچھر اب آزاد ہو چکے تھے!

جب زمین کے خالق نے آہکا سے کہا تھا کہ وہ تھیلے کا خیال رکھے، تو وہ سمجھ گیا تھا کہ وہ جلد ہی بیزار ہو جائے گی اور مچھروں کو آزاد کر دے گی۔ اگرچہ مچھر انسانوں اور جانوروں کے لیے تکلیف دہ ہو سکتے ہیں، لیکن وہ فائدے مند بھی ہیں۔ پرندوں اور مچھلیوں کے لیے مچھر ضروری خوراک ہیں۔ اور مچھر پھولوں اور دیگر پودوں کو پھیلانےمیں مدد کرتے ہیں۔ مچھر سامی لوگوں کے لیے «بیگا» یعنی اچھے مددگار بھی ہیں۔ وہ قُطبی ہرن کو اونچے پہاڑوں کی طرف ہنکا کر ان کے ریوڑ کو اکٹھا کرنے میں مدد کرتے ہیں۔

جب سے آہکا نے تھیلا کھولا اور مچھر باہر نکلے، تب سے مچھر ہرگرمیوں میں سامی سرزمین «ساپمی» میں واپس آتے ہیں۔ کہا جاتا ہے کہ مچھر ہمیشہ گرمیوں کے آغاز ہوتے ہی واپس آ جاتے ہیں، خواہ اُنہیں وہاں پہنچنے کے لیے لاٹھیوں کا سہارا ہی کیوں نہ لینا پڑے۔ اور اس طرح مچھر «ساپمی» سرزمین پہ آ ئے!